Инновацийн үйлдвэрлэлийг нэмэгдүүлэх, хамтын ажиллагаа, түншлэлийг өргөжүүлэх, худалдан авалтыг бий болгох зорилгоор “Инновацийн 7 хоног-2019” арга хэмжээг Боловсрол, соёл, шинжлэх ухаан, спортын яамнаас 5 дах жилдээ 2019 оны 5 дугаар сарын 6-12-ны өдрүүдэд Улаанбаатар хотноо зохион байгуулж байгаа билээ.
“Инновацын 7 хоног” аяны хүрээнд Нийслэлийн Шинжлэх ухаан, үйлдвэрлэл, инновацийн газар "Инновацын үзэсгэлэн 2019”-г 5-р сарын 07, 08-ны өдрүүдэд Монголын Үндэсний Худалдаа Аж Үйлдвэрийн Танхимд зохион байгууллаа.
Үзэсгэлэнгийн үйл ажиллагааны нээлтэд Нийслэлийн инноваци, технологийн асуудал хариуцсан төслүүдийн удирдагч М.Халиунбат, Боловсрол, соёл, шинжлэх ухаан, спортын яамны инновацийн хэлтсийн дарга Д.Одгэрэл, Нийслэлийн Шинжлэх ухаан, үйлдвэрлэл, инновацийн газрын дарга Б.Бат-Эрдэнэ, МҮХАҮТ-ийн ерөнхий нарийн бичгийн дарга Б.Саруул нар оролцож үг хэллээ.
Энэ жилийн үзэсгэлэнд мэдээлэл технологи, төр, нийгэм, банк санхүү, эрүүл мэнд, хүнс, хөдөө аж ахуй, урлаг уран сайхан, уул уурхай, тоног төхөөрөмж зэрэг бүхий л салбарт инноваци нэвтрүүлж буй байгууллагуудын төлөөлөл болох 63 байгууллага 400 гаруй бүтээгдэхүүн үйлчилгээгээрээ оролцсон байна.
Мөн хүндэт зочноор Азийн бизнес инкубатор төвүүдийн холбооны бизнесийн зөвлөх Эрик Клок, Социнтернийн Олон Улсын байгууллагын Ази-Номхон далайн бүсийг төлөөлсөн дэд ерөнхийлөгч, Олон улсын санхүүгийн зөвлөх Д.Энхжаргал нар шинээр бүтээгдэхүүн, үйлчилгээгээ нэвтрүүлж буй старт-ап компани, энтрепренер залууст зориулан илтгэлээ тавилаа.
2 өдөр зохион байгуулагдсан үзэсгэлэнд оролцогч байгууллагуудаас “Олны таашаал” хүртсэн инновацийн бүтээгдэхүүнийг шалгаруулахаар sli.do сайтаар санал асуулга явуулсан ба нийт 5974 хүн хамрагдаж 47 хувийн саналаар “Erxes маркетингийн платформ” шалгарлаа.
“Инновацийн шилдэг бүтээгдэхүүн”, “Инновацийн шилдэг үйлчилгээ” шагналыг шалгаруулах шүүгчдийн бүрэлдэхүүнд олон улсын байгууллагын төлөөлөл болох Азийн бизнес инкубатор төвүүдийн холбооны бизнесийн зөвлөх Эрик Клок, "Мэрси Корпс"-ийн Санхүү, зах зээлийн шинжээч Свапнил Миндхэ, Азийн сангийн “Хотын засаглалыг сайжруулах төсөл”-ийн ахлах Б.Баттулга, төрийн байгууллагын төлөөлөл болох БСШУСЯ-ны Инновацийн хэлтсийн дарга Д.Одгэрэл, НШУҮИГ-ын Шинжлэх Ухаан, технологийн хэлтсийн дарга Г.Жаргалмаа нар оролцож 3 цагийн туршид шүүлт хийлээ.
“Инновацийн шилдэг бүтээгдэхүүн”-ээр МУИС-ийн мазаалай хиймэл дагуул, “Инновацийн шилдэг үйлчилгээ”-ээр “Мэксим консалтинг ХХК”-ийн ухаалаг шалгалтын систем тус тус шалгарлаа.
1 Сэтгэгдэл
Монгол орныг үйлдвэрлэгч,экспортлогч орон болгох томоохон зорилт тавьж одооноос бэлтгэл ажлаа эхлүүлэх цаг болсон. Инновацийн шинэ санааг олон зуугаар нь бий болгохын тулд эдийн засгийн хөшүүргийг яг энэ ажил руу оновчтой чиглүүлэх хэрэгтэй. Ихээхэн зарлагыг үргүй зарлагадаж байгаа нь харамсалтай байна. Гарч байгаа инновацаасаа олон инновацийн төвүүд байгуулаад юу бүтээсийн. Дэлхийн зах зээл дээр гайхуулчих монгол брэнд нэг ч алга. Миний мэдэх экспортын чигийн ганц нэг патенттай бүтээлүүд хөрөнгө мөнгө хараад 2-3 жил хэвтэж байх юм. Эрх мэдэлтэй нөлөө бүхий хүмүүст танилцуулсан байх боловч нэг нь ч хариу өгдөггүй юм билээ. Нэр устай нь зарласан ч болно. Сонирхолтой нь тэд маань инновацийг хөгжүүлэх тухай маш их ярьдаг нөхдүүд юм. Дэлхийд улирал дутамд гарч хэрэгжиж байдаг хэдэн мянган шинэ санаанд ганч болов шинэ бүтээгдхүүн нэмчих ажлыг энэ ажлын орой дээр суугаа эрхмүүд дэмжээд өгчихөөч гэж хүсье.