“Лос Анжелес Лэйкерс” баг шинэ эзэдтэй боллоо

Хойд Америкийн Үндэсний Сагсан Бөмбөгийн Холбооны (NBA) “Лос Анжелес Лэйкерс” баг шинэ эзэдтэй боллоо. Хөрөнгө оруулагч, тэрбумтан Жошуа Кушнер болон Walt Disney компанийн ерөнхийлөгч асан Роберт Айгер нар хамтран багийг 12.5 тэрбум ам.доллараар худалдаж авсан байна.

Өнгөрсөн жил тэрбумтан Марк Уолтер багийн дийлэнх хувьцааг худалдан авч, багийн үнэлгээг 10 тэрбум ам.долларт хүргэж байв. Уг хэлэлцээрийг NBA-ийн Удирдах Зөвлөл өнгөрсөн оны аравдугаар сард албан ёсоор баталгаажуулсан юм.

Марк Уолтер нь мөн “Лос Анжелес Дожерс” бэйсболын багийн эзэн бөгөөд спортын салбарт танигдсан нэгэн юм. Гэвч түүний эзэмшлийн компанид холбогдох хууль эрх зүйн шалгалт өнгөрсөн сард эхэлсэн нь түүний бизнесийн байдалд нөлөөлсөн гэж үзэж байна. Энэ нөхцөл байдал нь багийг богино хугацаанд зарах шийдвэр гаргахад нөлөөлсөн гэж ажиглагчид дүгнэж байна.

Жошуа Кушнер (41 настай) болон Роберт Айгер (75 настай) нар өмнө нь Лас Вегас хотод шинэ баг байгуулах төсөл дээр хамтран ажиллах төлөвлөгөөтэй байсан ч энэхүү баг худалдан авалтын дараа уг төслөө орхисон гэж үзэж байна.

Мөн Жошуа Кушнер өмнө нь Олон Улсын Хөлбөмбөгийн Холбоо (FIFA)-ны ерөнхийлөгч Жианни Инфантиногийн шинэ төсөлд хөрөнгө оруулахаар төлөвлөж байсан бөгөөд өнгөрсөн долдугаар сард 20 тэрбум ам.долларын үнэлгээтэй арилжааны охин компани байгуулах санаагаа танилцуулсан нь олон нийтийн дунд маргаан үүсгэсэн юм.