Америкийн нэрт хөрөнгө оруулагч Уоррен Баффет 60 жилийн дараа Berkshire Hathaway компанийн төлөөлөн удирдах зөвлөлийн даргын албан тушаалаасаа бууж, эрх мэдлээ хүү Ховарддаа шилжүүллээ. Ингэснээр тус компанийн удирдлагын залгамж халааг шилжүүлэх үйл явц эцсийн шатандаа оржээ. Одоо 96 настай Баффет “хүндэт ерөнхийлөгч”-ийн албан тушаалтай бөгөөд компанийн төлөөлөн удирдах зөвлөлд туршлага, үзэл бодлоо хуваалцах үүрэгтэй үлдэх юм.
Баффет есөн сарын өмнө гүйцэтгэх захирлын албан тушаалыг Грег Абельд шилжүүлсэн байна. Түүний хүү Ховард 1993 оноос хойш төлөөлөн удирдах зөвлөлийн гишүүнээр ажиллаж иржээ. Баффетыг орчин үеийн хамгийн амжилттай хөрөнгө оруулагчдын нэг гэж үздэг бөгөөд тэрээр 1965 онд дампуурлын ирмэгт байсан Нью Ингландын нэхмэлийн үйлдвэр Berkshire Hathaway-ийг удирдлагадаа авч, $1.1 их наяд долларын зах зээлийн үнэлгээтэй компанид өргөжүүлсэн.
Одоогоор тус компани автомашины даатгалын GEICO, сүүн бүтээгдэхүүний Dairy Queen, BNSF төмөр замын сүлжээ зэрэг олон алдартай брэндүүдийг эзэмшдэг. Мөн Apple, Coca-Cola зэрэг компанийн томоохон хувь эзэмшигч юм. Баффет өдөрт таван лааз Coca-Cola ундаа уудаг гэж мэдэгддэг.
Түүний хөрөнгө оруулалтын фокус нь “үнэт зүйлд суурилсан хөрөнгө оруулалт” буюу суурь үзүүлэлт сайтай компаниудыг боломжийн үнээр худалдан авч олон жил хадгалах стратегид оршдог. Баффет төлөөлөн удирдах зөвлөлийн даргаар ажиллах хугацаандаа компанийн соёл, үнэт зүйлсийг хамгаалж, залгамж халааг шилжүүлэхийг зорьсон бөгөөд захидалдаа энэ үйл явц дуусах цаг болсон гэжээ.
Баффет саяхан 96 насныхаа төрсөн өдрийг тэмдэглэснийг дурьдаж, залгамж халааг дамжуулах явцад компаниудыг удирдах шинэ үеийг бэлдэхэд анхаарлаа төвлөрүүлж буйгаа илэрхийлсэн байна. Цаашид Грег Абель стратеги, хөрөнгө оруулалтын шийдвэрүүдийг удирдах бол Ховард Баффет компанийн соёл, үнэт зүйлсийг хадгалах үүрэгтэй аж.
Баффет өөрийн үйл ажиллагааны туршлагаа хуваалцаж, төлөөлөн удирдах зөвлөлийн дарга байх хугацаа нь “амьдралынх нь хамгийн том нэр төрийн хэрэг” байсан хэмээн тэмдэглэлээ. Тэрбээр эцэст нь “Цаг хугацаа үргэлж ялдаг” гэдгийг хүлээн зөвшөөрсөн байна.
Сэтгэгдэл