Архангайд мал хулгайлах хэрэгт холбогдсон 154 хэргийг шүүхэд шилжүүлэв

Прокурорын байгууллагаас 2023 оны наймдугаар сарын байдлаар Эрүүгийн хуулийн 17.12 дугаар зүйлд заасан “мал хулгайлах” гэмт хэрэгт холбогдсон 270 хүнд холбогдох 154 хэрэгт яллах дүгнэлт үйлдэн, хэргийг шүүхэд шилжүүлсэн байна.

Архангай аймгийн прокурорын газар энэ оны наймдугаар сарын 28-нд шүүхэд шилжүүлсэн “олон тооны мал хулгайлах” гэмт хэрэгт холбогдсон 27 хүнд холбогдох хэрэгт илүү дэлгэрэнгүй мэдээлэл өглөө.

Прокурорын мэдээллээр, П.Т нарын нэр бүхий 27 яллагдагч нь 2014-2026 онуудад Архангай, Төв, Булган зэрэг аймгийн нутаг дэвсгэрт иргэдийн 334 тооны малыг хулгайлж, 30 иргэнд 113 сая төгрөгийн хохирол учруулсан байна. Мөн бусдын орон байранд нэвтэрч эд хөрөнгө хулгайлснаар 27 иргэнд 74 сая төгрөгийн хохирол учруулжээ. Тэдгээр яллагдагчид нь хулгайлах гэмт хэргийг байнга үйлдэж, амьжиргаагаа залгуулан, бусдын эд хөрөнгийг залилсан бөгөөд үүнээс гадна бусдын бие махбодод халдаж, эрүүл мэндэд нь хөнгөн хохирол санаатай учруулсан гэмт хэрэг үйлдсэн гэж прокуророос мэдээллээ.

Прокуророос Эрүүгийн хуулийн холбогдох заалтуудаар, тухайлбал 17.1 дүгээр зүйл (хулгайлах), 17.12 дугаар зүйл (мал хулгайлах), 17.3 дугаар зүйл (залилах), 17.7 дугаар зүйл (тээврийн хэрэгслийг зөвшөөрөлгүй авч явах), 18.6 дугаар зүйл (мөнгө угаах), 11.6 дугаар зүйл (хөнгөн хохирол учруулах)-д зааснаар яллах дүгнэлт үйлдэн, Архангай аймаг дахь сум дундын анхан шатны шүүхэд шилжүүлжээ.

Улсын Ерөнхий Прокурорын Газраас энэхүү мэдээллийг албан ёсоор гаргасан байна.