Баянхонгор аймгийн ИТХ-ын дарга Ц.Отгонбаяр, аймгийн засаг дарга Г.Батжаргал нарын 6 хүнд холбогдох авлигын хэргийг нийслэлийн Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх хэлэлцэн шийдвэр гаргалаа. Шүүхээс Г.Батжаргалыг хахууль авах, эрх мэдэл, албан тушаалаа урвуулан ашигласан гэм буруутайд тооцож, нийтийн албанд 8 жил ажиллах эрхийг нь хасаж, 31.8 сая төгрөгөөр торгосон байна. Мөн Ц.Отгонбаярыг хахууль авсан гэмт хэрэгт буруутгаж, нийтийн албанд 3 жил ажиллах эрхийг нь хасаж, 31.8 сая төгрөгөөр торгосон юм. Хахуульд авсан нийт 100 сая төгрөгийг тэнцүүгээр гаргуулж, улсын орлого болгохоор шийдвэрлэсэн байна.
Тус аймгийн ЗДТГ-ын Хөрөнгө оруулалт, хөгжлийн бодлого төлөвлөлтийн хэлтсийн дарга Д.Ихбаяр, Жаргалант сумын засаг дарга Д.Сайнбилэг, “Агьхаарвист” ХХК-ийн гүйцэтгэх захирал С.Мөнхболд нарын нийтийн албанд ажиллах эрхийг 5 жилээр хасаад, 10 сая төгрөгийн торгууль ногдуулсан байна. Мөн “Эко грийнланд” ХХК-ийн нягтлан бодогч З.Эвлэгсайханг хахууль өгөх гэмт хэрэгт буруутгаж, нийтийн албанд ажиллах эрхийг 2 жилээр хасаж, 6 сая төгрөгөөр торгох шийдвэр гаргав.
Шүүхийн шийдвэрийн өмнөх нөхцөл байдлаас үзэхэд, Г.Батжаргал, Ц.Отгонбаяр нар “Эко грийнланд” ХХК-ийг Тарган, Хөшөөт орчмын нөхөн сэргээлтийн тендерт шалгаруулахаар тохиролцсон байна. 2017 оны 6 дугаар сарын 21-нд Ц.Отгонбаяр “Эко грийнланд” ХХК-ийн нягтлан бодогч З.Эвлэгсайханаас 100 сая төгрөгийн хахууль авсан гэж тэмдэглэгдсэн.
Дараа нь аймгийн ЗДТГ-ын Хөрөнгө оруулалт, хөгжлийн бодлого төлөвлөлтийн хэлтсийн дарга Д.Ихбаярт нөхөн сэргээлтийн тендерт шалгаруулах үүрэг хүлээлгэсэн юм. Д.Ихбаяр нөхөн сэргээлтийн аж ахуйн нэгжүүдийг сонгон шалгаруулах ажлын хэсгийн даргаар томилогдон ажилласан. Тарган нөхөн сэргээлт хийх шийдвэр гаргасан боловч Хөшөөтөд нөхөн сэргээлтийн шийдвэр гараагүй байжээ. Гэсэн ч Д.Ихбаяр энэ мэдэгдлийг үл тоон гэрээндээ Хөшөөтийг нэмж тусгасан байна.
Үүний үр дүнд Д.Ихбаяр, Жаргалант сумын засаг дарга Д.Сайнбилэг, “Агьхаарвист” ХХК-ийн гүйцэтгэх захирал С.Мөнхболд нар 2017 оны 7 дугаар сарын 20-нд нөхөн сэргээлтийн гэрээг “Эко грийнланд” ХХК-тай байгуулжээ.
Түүнчлэн Жаргалант сумын засаг дарга Д.Сайнбилэг 2017, 2018 оны 6 дугаар сарын 27, 11-нд “Агьхаарвист” ХХК-тай гэрээ байгуулсан байна. Гэрээ нь ашигт малтмалын тусгай зөвшөөрөлтэй газарт нөхөн сэргээлт хийхтэй холбоотой боловч “Агьхаарвист” ХХК нь тусгай зөвшөөрөл эзэмшдэггүй бөгөөд энэ үйл ажиллагаанд хамаарах эрх зүйн үндэслэлгүй аж.
Энэхүү авлигын хэрэгт холбогдох шалгалтыг АТГ 2023 онд явуулж, прокурор хууль тогтоомжийн дагуу яллах дүгнэлт боловсруулан, шүүхэд шилжүүлсэн байна.


Сэтгэгдэл