Улаанбаатар хотод өргөн хэрэглээний барааны үнэ буурчээ

Үндэсний статистикийн хороо (ҮСХ) энэ сарын 10-ны өдрийн байдлаар нийслэл болон орон нутгийн өргөн хэрэглээний бараа бүтээгдэхүүний үнийн судалгааг танилцууллаа. Улаанбаатар хотод өргөн хэрэглээний барааны дундаж үнэ өмнөх долоо хоногоос 1.1 хувь, өмнөх сарынхаас хоёр хувиар буурсан байна.

Махны үнийн хувьд, хонины ястай мах килограмм нь 27,342 төгрөгөөс 27,063 төгрөг болж нэг хувиар буурсан бол үхрийн цул мах 37,223 төгрөг болж хямдарчээ. Үхрийн ястай мах килограмм нь 32,520 төгрөгөөс 32,230 төгрөг болж 0.9 хувиар буурсан байна. Хүнсний ногооны дунд дотоодын төмсний үнэ 18.2 хувиар буурч, килограмм нь 3,523 төгрөгөөс 2,883 төгрөг болжээ.

Бусад өргөн хэрэглээний бараа бүтээгдэхүүний үнэ өмнөх долоо хоногийн түвшинд тогтвортой байв.

Орон нутгийн зах зээлд гол нэрийн барааны үнийн хөдөлгөөн харилцан адилгүй байна. Аймгуудын хувьд гурил, элсэн чихэр болон дизель түлшний үнэ өссөн бол мах махан бүтээгдэхүүн, сүү болон цагаан будааны үнэ өмнөх долоо хоногоос бага зэрэг буурсан байна. Үхрийн мах килограмм нь 26,219 төгрөг, хонины мах 21,894 төгрөг болж буурсан үзүүлэлттэй байна. Харин дизель түлш литр тутамдаа 2.0 хувиар өсжээ.

Монгол Улсын эдийн засгийн өсөлт хоёр оронтой тоонд шилжихийн хэрээр нефтийн бүтээгдэхүүний үнийг даган гол нэрийн бараа бүтээгдэхүүний үнэ өсөх хандлагатай байгаа ч одоогоор зах зээл дээр үнийн бууралт болон тогтворжилт үргэлжилсээр байна.