Монголын зүүн нутгийн Дуурлиг нарсны цогцолбороос олдсон 2000 орчим жилийн настай Хүннүгийн үеийн хамгийн том бунхны дөрвөн жилийн малтлага дуусчээ. БНСУ-ын Үндэсний музей, Монгол Улсын ШУА-ийн Археологийн хүрээлэн, Монголын Үндэсний музейн хамтарсан багийн судалсан уг бунхан нь 160 дугаар бөгөөд үүдэн хонгилтойгоо нийлээд 73 метр урт, 14.5 метр гүн, есөн үе чулуун хучлагатай байна.
НТ I–II зууны үед холбогдох өндөр язгууртны булш гэж тооцогдож буй энэ бунхнаас нийт 413 ховор олдвор илрүүлжээ. Тэдгээрийн дунд Ромын эзэнт гүрний гаралтай байж болзошгүй тунгалаг шилэн сав, Хань улсын хийцийг өөрчлөн боловсруулсан 15 ширхэг хаш чулуун эдлэл, лакаар бүрсэн сүйх тэрэгний үлдэгдэл багтсан байна.
Мөн Солонгосын хойгийн Лэлангийн үеийн загвартай төстэй болор болон алтан ялтастай мөнгөн морины хэрэгсэл илэрсэн нь Хүннүгийн булшнаас анх удаа олдсон ховор зүйл болжээ.
Судлаачид цаашид шилэн савны химийн найрлагыг шинжилж гарал үүслийг тодруулах, мөн авснаас илэрсэн хүний шүд, үсээр ДНХ-ын шинжилгээ хийхээр төлөвлөж байна.
Сэтгэгдэл